163: 'T NAUTEKROAM VAN DE GREUNGPLETS

Na j éme dee kloefkapers van 't Stadois al e poar kieëre zite zieëvere n auver de bloemekromekes oep de Greungplets. Oitaindelek éme ze noa vaul gepaloaver dan toch mor gezei da d aungs bloemekromekes muige blaive stoan, mor wa t dan mé t da nautekromeke ? Der ade z'oek al auver beslist da t da must oepgedoekt were. Mor dan éme ze ni mé medam Josy Borms gereikend. Dee zei nateurlek ( oo zau de zélef zén). "As dee bloemekromekes muige blaive stoan, dan zeeng kik ni j in weroem da mai nautekroam wél zau mute verdwaine".

Dee van 't stadois éme zoe w as algemieën geweite n is ver ales ne n oitlég. Wételek gezeeng éme ze meschin wél gelaik. Mor der is nog altaid de wét én de toopaseeng dervan. Da meingske sto na j al 26 joar oep da pletske netsjes te verkoeëpe n én noeët ei t der neemand derauver gekloagd. Inteigendieël. Vaul meingse ( én dan veral toeriste) veengde n et tof da t er zoe w e kromeke sto d oep de Greungplets. Dee van da kot oep de Groeëte Mart doong gewoeën on broeëdroeëf. Zoegezei sto t da kroam in de wég ver d' événemeingte dee gorganiseerd were oep de Greungplets. Joa, gai de main, da's dieë pieër ni. Dee zogenomd' événemeingte zule nateurlek mieër poong in de stadskas breinge.

Na j is medam Borms van plan en peteese t'aawe n oem te protesteire teige dee j onrechtvoardegad.

W' aupe da d ieël vaul sinjaure doar un aendtieëkeneeng zule n aungderzéte , want aungder aungs gezei j én gezweige: dee gaste van 't Schoeë Verdeep éme de léste taid nogal NAUTE n oep une zaengk !