Aentwaereps

woensdag, februari 14, 2007

079: Seengt Valentain








In Frankrek , in ’t départemeingt ” Indre” in de streik genoemd “Centre Val de Loire” lei g et derepke “Saint Valentin”, zoe genoemd no de patroeënailege van de verleefde kopeltjes..
Eeder joar teige de vieërteengde feibrewoare wert er doar fieëst geveerd. ’t Is mor e klain derepke van amper en 300 inwoeëners woar da t dan kopeltjes van auver ieël de wèèreld no too kaume ver e fieëstelek weekeingd.






Weroem da na zjust de vieërteengde feibrewoare ’t fieëst van de verleefde kopeltsjes gewere n is da wét neemand zjust. Woar komt da fieëst aigelek vandoan ? Den ieëne zei da t da d is oemda raungd dieën taid de vaugeltjes un nésjes begine te bauwe. Den aendere zei t dan wér da d et no ne pastoeër genoemd weer dieë de beveile van de kaizer ( Claudius II) negeirde én joonge maskes mé soldoate leet trauwe in ’t gaim. Ongetraude soldoate zauwe beiter soldoate gewést zén.


En ieëste veroltsje is ’t volgende:



Da ch gebuirde laengk geleije in ’t joar 270. Der was ne joonge Romain dieë beslaute n ad zenaige tot et kristendoem te bekieëre. De Romaine woare der ni mé j akaurd ; a weer gemarteld én ze kapte zene kop eraf. Mor vuir da t da kon gebuire schreif em nog gaa w en brifke no de dochter van den dirékteër van ‘t gevang. A j ad noamelek al en tadsje n en groeëte boeën ver uir. Da brifke was aungdertieëkend mé s zene noam “Valentin”

En twide veroltsje zégt dan wér wa d aenders:


’t Zau ne Fraense groaf gewést zen dieën in’t begin van de véfteengd’ ieëw duir d’Eingelse gevange genaume weer én oepgeslaute in den “Tower of London” . Dieë zau no zen vraa leefdesbreeve geschreive n éme dee j em “valentines” noemde.






Karmeleetekaerek
(Mainz)


En darde veroltsje go d auver de Romainse godin “Juno” :


Da was de kuinegin van al de gaude n én godine. Dee gaf vaul fieësjes én oep de vieërteengde feibrewoare gaf z’uir grutste fieëst. Al de Romainse joonge gaste n én al de joonge maskes weere der oep oitgenoeëdegd. Oep da fieëst weer er lotsjentrék gedoan oem te zeeng wéleke joonge da t er mé wélek maske n oep stap mocht goan. Dernoa was er e groeët vruchtboradsfieëst in de grote werin da “Romulus” én” Remus” groeëtgebrocht woare duir en wolvin.


0 reacties:

Een reactie plaatsen

Aanmelden bij Reacties plaatsen [Atom]

Links naar dit bericht:

Een link maken

<< Homepage