134: Waurdspeileenge

Nen blèètsmool

( a j aud ni f van mopekes)

Vandoag ém ek gin goesteeng oem eet serjuis oep menen blog te zéte. Den baug kan ni j altaid gespane ston (da s zei Fraenske n oeëk én a j ad krome bieëne). Deroem ad ek gedocht van is eet plezaent vuir te schautele. Wa t deingt de van e spéleke mé waurde? Soemege van de zinekes dee naa gon volege zule wél wa d 'inspaneeng vroage van oewe platekèès mor as 't nen troeëst kan zén: 't schaint da t da gezaungd is: én af én too zul de wél is is mute lache (da d'aup ek tenmeengste). Alei, eer goan we dan:




En kaizersnei is en aupenboareeng

De joong van vandoag zén ni f van gistere.

Van no de klok te zeeng, wer d aungze klaine waizer

’t Is wéral vreug teloat.

De joonge gaste van teigewaurdeg loeëpe smoandagsmorges mé j une velau in un aend oemda t weekeingd er wéral oep zit.

D’ieën flés mélek teige d’aender: zau d ega mé mai wile traawe en kinekes koeëpe ? Zei t aender flés: Da ch goa ni want ‘k zén gestérelizeird.

Mene nuis loept en men voote reeke.

’t Was ni den ieëste kieër da t de garson ne steik leet vale.

Duir zain toodoong, stoong uir bloos aupe.

De ploateverkoeëper was auver zen toore.

De mane van de post gon stoake n oem te zeeng wa t er oit de bus zal kaume.

‘K kreig en krop in men kèèl toongs da’k dieë saload zag.

Niks is leengker dan ver réchter speile.

In de midelieëwe koste de meingse n al goo reikene; veral veerendieële.

Vuirege weik zén we nor en vuirdracht auver sigaréte gon lestere. W’éme n er ieël vaul van oepgestauke.

Da pèèrd en dee kooj lèève gelak kat en aungd.

A miste zene saltau, a was er ieëmel van aungderstenbauve.

Oo kun de ne vis on de lain kraige ? Zégt gewoeën da t em on den télefon mut kaume.

Den bultenér wist mor al te goo da t em 't aeregste n achter de rug had.

Z’éme de kursus lase n afgelast.

Al dee vermoagereengskeure der zé de vet mé.

Ba de “weightwatchers” zén er vaif vraawe baigekaume; mor der zén er oek vaif afgevale.

Komt er af zei t de flik of ’k zét oe deroep ! Veroit, achteroit! As ‘t nog laengk deurt , zal ’t gaa gedoan zén !

Dee j alieën-stoande vraa zukt e zitend beroop.

De sjirureg amputeirde n en bieën én présenteirde n en peiperdeure reikeneeng. Den ”Afzéter!”

De sitewoase van de dakloeëze n analfabeite n is ni j oem auver nor ois te schraive.

De verleefde koater mokte de katin blai me j en dooje mus.

Oep ieën bieën kun de ni stoan zei t de sjirureg en a begost et twide n oek t’ amputeire.

In Afganistan raije ze mé boemvole buse.

De lés reetdéke go ni t duir. Reet is zeek.

Taides den auverval oep de baengk weer de vrauweleke polees gedékt duir ne maneleke koleiga.
Go ch gerust no den doktaur, a wert er beiter van.

Dreengt altaid mé moate, noeët alieën .

Toongs da s zen zoak oep de flés geeng, gerokte n em on den draengk.

Zélefs de pastoeër must er on geloeëve !

Van meingse dee noeët wa ch geive der kraig ek wa f van.

Noa zen éĝzoame geeng em gepakt én gezakt nor ois.

Den doktaur lesterde no zen art én zei: eer klopt eets ni !

‘K ém mene pas verlaure en ‘k kaum ver ne neeve. Kan da fotauke van de vuirege nog deene ?

A zéte zen béste bieëntsje vuir en a must er zélefs zen aend ni f ver oemdroije.

De Brugse begantsjes éme de paus van kaent gemokt.

Wert bokser dan é de mieër kaens oep sloage.

De masjinist van den train verdwein zaungder e spaur noa te loate.

Den tantist trok en dik péns-joong.

A zei :”ge mui d is kaume n as den trap is afgezoagd “ én a woeënde n oep ’t gelaikvloors.

A leet uir zite want a zag uir nimer stoan.

De mane van de voilkaer olde n un schaawers oep.

A weer waker oemda s zen bieën sleep.

Da t er vaul aksideingte gebuirde n in de zoagerai weer al te gemakelek duir de veengers gezeeng.

Noada t de vis oit ‘t woater was, voelde n ém nategad.

En lachende kat

( dee j uiraige rotamezeirt)