138: JOHAN ROUFFAER

Johan Rouffaer is ni mieër ba j aungs

Aungze rézjiseër én akteër “Johann Rouffaer” is nimieër ba j aungs . A j is den breur van d’ aktris “Greet Rouffaer” én de neif van rézjiseër én akteër “Senne Rouffaer”. Ge zee ’t akteire n én 't rézjiseire zat blaikbor in de famile. A j ad ne zwoaren dijabeites én de lésten taid ieël vaul probleime mé s zenen tiker. A j is oep woensdag de 17den désémber in zene zeitel in ’t sloap gevale n én in stilte gestereve . Zen art mut et begeive n éme. Den doktaur ei ch gezei da t em er niks van zal geweite n éme. Da’s al ne troeëst ver de famile. A j is mor 54 joar gewere. Mooderzeel alieën woeënde n em in e sos-joal apartemeingtsje in de Willem Lepelstroat woar zen vreenge n em gevaungde n éme. Johann Rouffaer was aungderaendere vuirziter van ’t beurtkomitei “Onze Tuin”. Twieë joar geleije kreig em nog De Gaawe Nuis, oemda t em zoevaul gedoan ei f ver Seengt-Andrees .

A vaungd zenaige dan oek ni te schoeën oem mé t den bestel in zen aend de stroate van de Paroche van Mizeire prauper t’aawe ; want spaiteg genoeg zén der nog altaid kweebuse dee mieëne da s z’un velegad zoemor oep ’t stroat mute kipe. Oem dan nog mor te zwaige van dee zieëverére dee j er plezeer in veengde n oem leengs én réchs den bool te veréneweire. Derbai j organizeirde n em nen oeëp sos-joalkultureil' aktivitaite n oem et ver eederieën plezaent te moake in Seengt-Andrees. Aungderaendere n amezeirde n em de klainmane n én soemege beroopsakteërs mé s zen érschreive téjoaterstuk “De Helse Machine” , e stuk da vreuger duir d’Italjoanse “Commedia dell’Arte” oepgeveurd weer. Doarmei wau w em de keengdere de kaens geive n oek téjoater te speile. ’t Weer indertaid oepgeveurd in’t Zoiderpérsois.
Volgende zoaterdag wert er soaves ( tuse n alef zeive n én teeng eure)---in plets van de tradis-joneile neevejorsresépse -- en afschaidsresépse ver em gorganizeird.