048:De Groeëte Gust ei t de gieëst gegeive

Ieërgistere (de neigende novémber van ’t joar 2006(twieëdeuzendénzés))-- raungd élef eure soaves-- oeërde we da t de Groeëte Gust –de draivende kroan van de Katendaikdok van zene sus gevale was.
De masjinist van de Groeëte Gust zat nog in zen kabin én mankeirde gi schrameke. De kapitain van de sleipboat doikelde n in ’t woater. Dieë was aungderkoold én must no ’t gastes gebrocht were.
De Groeëte Gust must in oepdracht van ‘t Gemieëntelek Oavebedraif de duire van de Katendaikslois eroit neime ver en algemieën noazicht. ‘k Vroag menaige n af oo da s ze da naa gon barlike.
Oep ’t momeingt da t de Groeëte Gust kopekenaungder geeng, was em ni on’t waerek. Ze deingke da ’t sistèèm da must vuirkaume da t em oemvaer zau vale (antikaentelsistèèm) ni marsjeirde. Ieël woarschainlek ei t de Groeëte Gust zene lésten oasem oitgebloaze. Ze kune n em naa wél ba ’t audaizer gooje.
Da s zal en ieël dzjob were n oem de Groeëte Gust oit de dok te tréke. Worschainlek zule ze de sukelér ieëst in stuke mute zoage, want woar gon z’en kroan veengde dee de Gust kan oepéfe ?
Aigelek ad de Groeëte Gust noa mieër as féfteg joar traawen deengst al laengk mé péns-joon kune goan. Mor ge wét oo da t da goa: aa karaméle weite dikwels ni f van oepaawe.
Groeëte Gust—’t momumeingt van de Katendaikdok --éme z’in “Schiedam” [scheedam] gebaud in 1950 (neigeteengaungderdféfteg). A weigt mor éfkes 150 (aungderdféfteg) ton. In dieën taid koste n em oem én ba de fieërteg miljoong Bélgise fraeng.
Da t doo mé deingke n on ne aendere Groeëte Gust, den beroemde gorila van de Zjolezjee. Dieë n is worschainlek van strés én verdreet no d’ieëwege jachtvélde vertroke, noada t em joarelaengk onschuldeg én zaungder verem van prosés oepgeslaute weer. ‘k Zeeng em der nog zite in ze vaul te klai kotsje terwail em ze spausel eedere kieër wér oepterneeft in zen kas sloog. On zen tristeg’ oeëge kon de zeeng da t em droeëmde van ’t oorwaud in Afrika.